PROGJET PROTOSTORIE IN FRIÛL

Si sa che te Regjon Autonome Friûl Vignesie Julie a son i rescj di cetancj monuments preromans - cjistielîrs e tumui funeraris.

Dai agns Setante e je scomençade une grande opare di ricercje archeologjiche che, ancje se a moments, e à puartât contribûts impuartants pe cognossince storiche dal nestri teritori. Chest al è stât pussibil in gracie dal lavôr fat dai ricercjadôrs de Universitât di Triest, de Universitât di Udin cu la colaborazion de Sorintendence pai Bens Archeologjics e i contribûts de Regjon Autonome Friûl Vignesie Julie e de Fondazion C.R.U.P.

Lis ricercjis sui tumui e i cjistielîrs dal Friûl a àn prin di dut l'intent di fâ cognossi lis culturis nassudis te etât dal bronç e dal fier, periodis fondamentâi de storie plui antighe de Europe, cul fin ultin di vê une vision simpri plui clare e organiche dal svilup storic-culturâl di cheste regjon, che in diviersis fasis e à vût une funzion impuartante di puint sedi te direzion ovest-est, tra l'ambit venit-padan e il Friûl orientâl, il Cjars, la Istrie e la penisule balcaniche, sedi te direzion nord-sud, tra i teritoris alpins e dilà des Alps di une bande, lis cuestis dal alt Adriatic di chê altre.

Ae bisugne di savê si à di zontâ la necessitât di prudelâ il nestri patrimoni, par che nol vadi pierdût, promovi la cussience de ereditât che o vin vût dal passât e, duncje, di aumentâ il rispiet, soredut tes gnovis gjenerazions. Tra i prins obietîfs al è chel di fâ cognossi al public e ai students des scuelis di ogni ordin e grât i risultâts des ricercjis su la protostorie furlane midiant mostris, conferencis, lezions, publicazions divulgativis e ativitâts didatichis di diviers gjenars.

Par chest si à volût meti in vore un progjet di tutele e valorizazion des struturis restadis e di difusion dai risultâts otignûts fin cumò tal cjamp dai studis e de ricercje.

Par chest e cun chestis finalitâts, tal 2014 e je stade fate une gnove convenzion, che e à slargjât il progjet a un numar simpri plui grant di comuns interessâts e che e viôt come firmataris i Comuns di Basilian, Cjasteons di Strade, Codroip, Cosean, Dignan, Feagne, Flaiban, Listize, Merêt di Tombe, Puçui, Rivis di Arcjan, Spilimberc, Udin con cjâf file il Comun di Sedean.

  

SCHEDIS DIDATICHIS: LA VITE DI OGNI Dì TAI BORCS PROTOSTORICS

"Lis imagjins a son stadis publicadis par concession dal Ministeri dai bens e des ativitâts culturâls e dal turisim - Sorintendence Archeologjiche dal Friûl Vignesie Julie. E je improibide ogni altre riproduzion cun ogni mieç cence la autorizazion de Sorintendence". 

(art. 108 co. 3 bis dal D. Lgs. 42/2004 come modificât dal art. 12 co. 3 letare b, dal Decret Leç “Art Bonus” dal 31/05/2014, convertît in Leç cun modificazions ai 29/07/2014) e je libare la difusion cun ogni mieç des imagjins di bens culturâi, vudis in maniere legjitime, par che no sedin riprodusudis a fin di vuadagn, nancje indiret, finalizade ae promozion de cognossince dal patrimoni culturâl.