A son pôcs agns che in Friûl si à tacade une ricercje sistematiche di testemoneancis de preistorie e il materiâl di piere lavorade cjatât fin cumò al è cuasi dal dut dal periodi neolitic e plui resint.
Chest al dipent ancje dal fat che lis aluvions daspò de glaciazion dal periodi Würms a àn scancelât la plui part dai materiâi antropics des epochis plui vieris.
O fevelarai dome des stazions archeologjichis protostorichis plui evidentis dal nestri teritori e che duncje a son testemoneance di un popolament une vore antîc.
Lis plui impuartantis a son pal sigûr chês di Puçui, dongje dal Cormôr, dulà che a son vignûts fûr materiâi dal periodi dal Bronç medi fint ae ete dal Fier.
Ancje a Cjasteons di Strade si è cjatât un abitât dal Bronç resint.
La lavorazion dai metai e fo cause di scuintris tra i diviers grups umans par caparâsi lis materiis primis che a coventavin e che si cjatavin in tieris une vore lontanis tra di lôr (par esempli il ram e il stagn, che a coventavin par produsi il bronç).
La competizion no fo pacifiche e chest al puartà a vê dibisugne di oparis difensivis: a nasserin cussì i cjistielîrs.
Al fo Lodovico Quarina, tai prins agns Cuarante, a scomençâ a studiâ chescj manufats in Friûl.
Cualchidun di chei si poiarin su rilêfs naturâi (come Rivis di Arcjan, Varian, i doi di Puçui, Puint S. Quirin, Firman e Orsarie), altris a son inte plane (come Sedean, Savalons e Gjalarian) e duncje a son dal dut opare dal om.
O fevelarai dal nestri cjistielîr di Gjalarian, in localitât “lis Rivis” te campagne, che si pues ben viodilu te sô forme a romp formade cun grums di tiere, larcs ae base cirche 12 metris e alts cirche 4-5 metris. Dentri e tor ator il teren al è coltivât e il fossâl che al jere dut ator al è plen di tiere.
“A son discomparîts il poç e, di doi secui in ca, une ancone medievâl dedicade ae Madone – al scriveve pre Toffolutti – al reste dome il jet de Lavie: i sgjâfs che si podaressin fâ a daressin lûs ae storie”.
La grandece de aree, cirche 5 etars, e fâs pensâ che il cjistielîr al coventàs sedi pai oms che pes bestiis. La aghe de ploie te Lavie e podeve coventâ par dâur di bevi.